Эрхэм хүндэт Та бүхэн, 

Эрдмийн их уурхай, оюуны ариун өргөө болсон 100 жилийн түүхт Биндэр сумын Ерөнхий Боловсролын сургуулийн цахим хуудаст тавтай морилно уу! 

Монгол улсын ууган сургуулиудын нэг болж 1924 онд  байгуулагдсан цагаасаа сургалтын чанар, сурагч, төгсөгчдийнхөө амжилтыг эн тэргүүнд тавьж, сургуулиа улам хөгжүүлж, бэхжүүлэхийн төлөө хичээн ажиллаж ирсэн манай үе үеийн удирдлага, багш, ажилчид, хамт олны бүтээсэн түүх, туршлага, үнэт зүйл, алсын хараа, эрхэм зорилго, сургалтын бодлого, зорилго, өдөр тутмын хичээл сургалтын үйл ажиллагаа, сурагч төгсөгчдийн гаргасан амжилт гээд бидэнтэй холбоотой албан ёсны мэдээллийг энэхүү хуудаснаас авч болно. 

Сурагч, төгсөгч, эцэг эх, асран хамгаалагч, хамтран ажиллагч, хөрөнгө оруулагч, орон нутаг зэрэг бүх талын оролцоо, дэмжлэгийг нэмэгдүүлэхэд манай цахим хуудас чухал үүрэг гүйцэтгэх, “Бидний ойлголцлын нэгдсэн талбар” болно гэдэгт итгэж байна. 

“Эерэг хандлага, зөв дадалтай, зорилгоо ухамсарласан, бүтээлч, хариуцлагатай иргэнийг төлөвшүүлнэ” гэсэн алсын харааг бодит үйл болгон хэрэгжүүлэхийн төлөө бид сурагч хүүхдүүд, багш ажилчид, хамт олныхоо бодлого, үйл ажиллагааны төлөвлөлт, хэрэгжилт, үр дүнг цаг тухайд нь тогтмол хуваалцаж, сурах, хөгжих таатай, шинэлэг, шилдэг орчинг бүрдүүлэхэд анхаарч ажиллах болно. 

Манай сургуулийн үнэт зүйл:

Шавьдаа хайртай – Эрдэмт багш нар

Шамдан суралцдаг – Ирээдүйн эзэд

Авьяас мэдлэгээрээ манлайлдаг – Амжилтын эзэд

Араараа модтой Биндэръяа нутгаа дуурсгасан – Төгсөгчид билээ.

Боловсролтой иргэдийг бэлтгэн гаргана гэдэг зөвхөн сургууль, багш нарын үүрэг биш, бүх нийтийн үйл хэрэг учраас сум, орон нутаг, аймаг хот, улс орон гэдэг бодит хил хязгаараас үл хамааран дэлхийн хаанаас ч, хүссэн цагтаа манай сургуулийн талаарх албан ёсны мэдээлэлтэй танилцаж, сонирхсон асуултаа асууж, үнэ цэнтэй санал бодлоо хуваалцаж, хувь нэмрээ оруулахыг хүссэн хэн бүхэнтэй хамтарч ажиллахдаа бид баяртай байх болно.