СЭТГЭЛ ЗҮЙН НӨХЦӨЛ БАЙДЛЫГ СУДЛАХ, ЗӨВЛӨГӨӨ ӨГӨХ ҮЙЛЧИЛГЭЭНИЙ ҮР ДҮН

Биндэр ЕБС – ийн сэтгэл зүйч Т. Дэлгэрмаа сэтгэл зүйн үйлчилгээг үе шаттайгаар сургуулийнхаа багш, ажилчид, сурагчдын хүрээнд зохион байгуулж байна. Үүнд сэтгэл зүйн нөхцөл байдлыг судлах оношилгоонд нас сэтгэхүйн онцлогийг харгалзан 9-12-р ангийн нийт суралцагчдыг хамруулсан томоохон судалгааны ажил өнгөрсөн улиралд болж өнгөрөв. Нийт ахлах ангийн 210 гаруй суралцагч хамрагдах байснаас 197 суралцагч хамрагдсан байна. Оношилгоонд хамрагдаагүй бусад сурагчдын шалгаан нь өвчтэй, чөлөөтэй, оношилгооны явцад ирээгүй зэрэг болно. Харин 6-8 дугаар ангийн суралцагчдыг бүлгийн зөвлөгөөний явцад ажиглан ганцаарчилсан оношилгоо, зөвлөгөөнд татан оролцуулж байна.

Үүнээс ахлах ангийн эрсдэлт зан үйл, сэтгэл зүйн хямралтай 79 сурагч илэрсэн бөгөөд нийт суралцагчдын 40 хувийг эзэлж байна.  18 суралцагчдыг сонгон, төлөвлөгөө гарган ажиллаж байгаа. Харин бага ангийн оношилгоонд хамрагдсан 20 суралцагчдын 10 сурагч нь хөгжлийн онцлогтой байж болзошгүй бөгөөд 8 сурагч нь эрсдэлт зан үйл болон сэтгэл зүйн хямралтай байна. Хөгжлийн онцлогтой байж болзошгүй 10 сурагчийг холбогдох байгууллагууд руу зуучилсан.

Сэтгэл зүйн нөхцөл байдлыг судлах, зөвлөгөө өгөх үйлчилгээгээр дараах үр дүн, дүгнэлтэд хүрч байна. Судалгааг 88 асуулттай  тест хэлбэрээр сонгосон бөгөөд түүний тайлбар, зөвлөмж бүхий 3-4 хуудас  мэдээлэл судалгаанд хамрагдсан хүүхэд болгонд (197) очиж байгаа тул сэтгэл зүйн бага, дунд хямралтай суралцагчид тайлбар зөвлөмжтэй танилцаж, ганцаарчилсан зөвлөгөөнд ороогүй ч сэтгэл зүйгээ удирдах ач холбогдолтой хэрэгцээтэй аргачлал болохыг онцолж байна. 

Жилийн үйл ажиллагааны төлөвлөгөөнд тусган төлөвлөж, давтамжтай зохион байгуулах хүсэлтийг судлуулагч бүр нээлттэй илэрхийлж байсан нь энэ төрлийн оношилгооны  хэрэгцээ шаардлага их байгааг илтгэж байна. Мөн хүүхэд бүрийн ялгаатай байдал, онцлогийн талаар мэдээлэлтэй болсон нь суралцагчдын сэтгэл зүйн боловсролыг нэмэгдүүлсэн үр дүнтэй ажлын нэг боллоо.  

ЗӨӨЛӨН УР ЧАДВАРТ СУРАЛЦУУЛАХ СУРГАЛТЫН ҮР ДҮН

Бүлгийн сургалтаар 7-10-р ангийн 110 гаруй сурагчдыг анги удирдсан багш нартай хамтран “Бид нэг хамт олон” ,  “Хайр ба шохоорхол”, “Хил хязгаар”, “Мэдрэмжтэй нөхөрлөл” сэдвүүдээр сургалтад хамруулаад байна. Харин 8А ангийг сонгон авч зөөлөн ур чадварт суралцуулах сургалтыг зохион байгуулж, дөрвөн удаа сургалтыг зохион байгуулаад байна.

Зөөлөн ур чадварт суралцуулах сургалтаар дараах үр дүн, дүгнэлтэд хүрч байна. 8А ангийн суралцагчдын хувьд зөөлөн ур чадвар буюу уураа барих, бусдын нөлөөнд автахгүй байх, эерэг харилцааны талаар бодит ойлголт, мэдлэг нэмэгдэгдсэн. Тухайн сургалт нь оролцоонд тулгуурласан тул суралцагч хөтөлбөрийн агуулгыг өөрийн биеэр мэдрэх, ойлгох, бусад суралцагчийн санаа бодлыг тусган авах, тухайн сэдэв болоод хам сэдвийн хүрээнд олон асуудалд өөрийн байр суурь, бодол санаагаа илэрхийлэх, бусдын үзэл бодлыг сонсох, хүндэтгэн үзэх зэрэг эерэг хандлагад суралцахын сацуу тухайн сургалтыг дахин авах хүсэлтэй байгаагаа оролцогч бүр илэрхийлж байсан нь энэхүү сургалтын бас нэгэн онцлог, давуу тал болсон гэж сэтгэл зүйчийн зүгээс үзэж байна.